CERITA (02)

HATI SELEMBUT SAGU

Oleh: Oesman Doank

                                                        DUA

          Juleha bukan kagak mau atawa males banget masak. Sebab, kalo cuma sebatas masak aer sama mie instan cukup mahir. Kalo masak yang laen, die emang sama sekali kagak bisa, alias jauh dari ahli. Tapi kalo soal makan atawa tinggal ngembat, makanan nyang udeh siap makan, gak ada nyang dia kagak doyan. Kalo nyang udeh mateng, misalnye pisang goring, meski baru diangkat dari penggorengan juga udeh langsung dicaplok.

          Begitulah Juleha

           Komeng kepengeeeeen banget nyadarin bokinnye. Cuman, tiap kali die mulai nyinggung kebiasaan Juleha, dengan tangkas Juleha berkelit. Die pasti bilang, supaye lakinye kagak ngedengerin omongan orang yang ngadu, baik dengan maksud tertentu maupun dengan maksud tidak tertentu tapi tujuannye udeh tentu

            "Biasanye tuh bang... orang nyang kayak gitu sebenernye ngiri sama Leha. Sebab, bininye kagak bisa masak tapi pinter ngayap. Makanye die berusahe ngejatohin Leha, berusaha ngerusak keharmonisan rumah tangga kite," kata Juleha

               Dulu, kala pertama kali menikah dan mereka tinggal di Komplek Gading retak, tentu aje Komeng percaya. Sebab, dia yakin bokinnye jujur. Cuma setelah banyak aduan, masukan, informasi dan lain lain, kepercayaan Komeng mulai nyusut sekian prosen. 

                  Sayangnye, Komeng nggak pernah bisa ngebuktiin kalo bokinnnye begini begitu dan begono. Pokoknye, Leha jago banget ngeles. Sampe minggu kemaren, Komeng belum dapetin ide cemerlang. Sehingga, die belon tau gimane caranye bisa mergokin Juleha. Nah, kalau dengan cara itu Komeng bisa ngebuktiin, mau nggak mau Komeng mesti bertindak tegas. Minimal, Komeng akan memulangkan Juleha ke orangtuanya.

                  Maksimal, tentu saja akan memutuskan tali perkawinan.

           Cuman, Komeng nggak mau bertindak drastis. Semisal bener, die kepingin ngasih peluang buat Juleha supaye die berbenah diri. Mudah mudahan aje, peluang n'tu dimanfaatin sebaik baiknya. Kan, jadi asoi kalo Juleha bisa berubah, 

                  Meski begitu, Komeng merasa sangat beruntung. Sebab, di kala die tahu kondisi bokinnye kayak nyang diceritain banyak tetangge, belum ada tanda tanda Juleha hamil. Jadi, kalau pun nantinya memvonis cerai, nggak ada yang diberatin. Lagian, buat ape mempertahankan isteri nyang kagak bener.

                  Cuma, Komeng tetap berharap Juleha berobah. Artinya, semisal die bisa mergokin Juleha dalam kondisi seperti yang dikatakan para tetangga, die nggak bakal langsung mengambil keputusan ekstrim dengan bilang good bye. Tapi,  mulangin ke orangtuanye dan minta dengan hormat agar Juleha dididik ulang.

Bersambung…..