CERITA (03)

HATI SELEMBUT SAGU

Oleh: Oesman Doank

TIGA

Seudeh masuk camp penggojlokan ulang, Komeng bilang die  bakal ngasih kesempetan kedua buat bokinnye. Komeng berharap, bokinnye ikhlas mengupgrade kelakuan. Kalo udeh di kasih kesempatan buat perbaikin prilaku tapi masih tetap kayak duren bonyok, ape boleh buat, deh.

"Pokoknye, kalau masih gak berobah seudeh gue kasih peluang... jangan panggil gue si Komeng," kate Komeng di depan sohib sekantor nyang pada semangat banget ngediskusiin bokin masing masing

" Pasti lo langsung cerein, dong," simpul Romli.

"Enak aje, lu,ngomong," tukas Komeng

"Maksud gue, kalo masih gitu juga gue mesti ngasih kesempetan ketiga. Nah, n'tu nyang terakhir. Kalo tetap kagak berobah,, baru gue bilang good bye"

Romli nyang salah nyimpulin, langsung garuk garuk kepala sembari ngegerutu dalem ati
"Gue kirain langsung dicerein. Gak taunye masih dikasih kesempetan ketiga.Lantas, kapan gue punya kesempetan buat ngedeketin Juleha?"

                                                             oooooo

KOMENG akhirnye diijinin cuti dan kesempetan cuti dimanfaatin buat nyelidikin ulah bokinnye, Juleha. Tentu aje   sama bokinnye die kagak bilang ambil cuti. Kalo bilang, dia pasti yakin, Juleha nggak bakal ngayap kemane mane. Sebab, selama ini, tiap Komeng ada di rumah, bokinnye emang nggak pernah ngayap, kecuali kayak nyang dikabarin orang orang, ninggalin rumah seudeh suaminye berangkat ke kantor

Jadi, Senin pagi gak beda sama hari laen di saat masuk kerja.

Kelar sarapan, Komeng pamit. Juleha mantep bener nyium tangan lakinye. Malah, ngedoain supaya pulangnye bisa bawa duit lebih. Kelar salamin lakinye, Juleha nyetel posisi supaye lakinye nyium jidatnye dengan sepenuh mesra. Kelar dicium jidatnye nyang sedikit agak nong nong, Juleha buru butu buka pintu pagar.

Lantas, Komeng  ngeraung raungin motornye. Seudeh manasin mesin motor nyang alhamdulilah kreditannye udeh lunas, Komeng ngasih salam. Juleha ngebales salam Komeng sambil ngeliatin kepergian suaminya dengan sangat takzim. Disebut begitu, soalnye Juleha terus menatap kepergian Komeng sambil ngelambai lambaian tangan, dan die baru masuk seudeh sosok lakinye ngilang dari pandangan.

" Laki gue kan udeh ngantor. Sekarang, giliran gue ngantor ke posko rumpian," kate Juleha, nyang kayaknye seneng banget lantaran yakin kalo lakinye bakal kayak biasa, balik ke rumah sekitar jam lima sore. 

Komeng nyang baru aje ke luar dari pintu gerbang perumahan,langsung ngarahin motornye ke sebuah mesjid nyang lokasinye kagak jauh dari jalan raya

Tanpa ragu, Komeng masuk ke halaman mesjid nyang cukup megah. Kelar markirin motor, Komeng langsung ke bagian teras mesjid. Kelar buka sepatu, Komeng lantas rebahan di teras. Die lantas ngeliat arlojinye.

"Kemane ni marbot mesjid.Biasanye ada di sini, " Komeng ngomong sendirian sambil plarak plirik, nyari sosok pak Karyadi nyang die kenal rajin ngejalanin tugas, 

"Tumben kagak keliatan? Ada ape yeee"

Komeng plarak plirik lagi. Nyari sosok pak Karyadi. Akhirnye Komeng nyimpulin yang dicari emang kagak ada. Makanye  Komeng lantas ngelangkah ke tempat wudhu.

Bersambung……….