CERITA (4)

HATI SELEMBUT SAGU

Oleh : Oesman Doank

EMPAT

         Kelar ngambil air wudhu, dengan santai Komeng kembali ngelangkah ke tempat semula. Kali ini, Komeng mesti rela shalat dhuha di teras mesjid. Emang nggak mungkin bisa shalat dhuha di dalem lantaran pintu mesjid dikonci.

       Emang gak masalah.Malah, Komeng tetap berusaha untuk shalat dhuha dengan khusuk. Dia gak lupa berdoa, minta sama Allah Subhanallah Taala supaye hati bokinnye dilempengin. Dijadiin wanita atawa perempuan yang sholehah.

       Kelar shalat dhuha, Komeng lantas ngenain sepatunye lagi.

       Baru dia ngerogoh kantong. Ngambil telepon genggam dan ngebel bokinnye.

       " Hallo...Eeeh, abang... emangnye udeh sampe kantor," kata Juleha nyang di kuping Komeng, suaranye kedenger begitu mesra.

       " Udeh atuh say... Alhamdulillah, selamet sampe di kantor,"sahut Komeng

       " Oke deh bang. Met kerja, yee. Maaf... jangan lama lama, soalnye, Leha lagi bersihin ikan. Ntar kalo ikannye malah digondol kucing gimane? Kembang juga belon disiram, tuh. Nah, abis eni Leha mau langsung nyiramin kembang"

       "Iye, deh. Met sibuk di dapur, yee say?" Kata Komeng, nyang lantas matiin hapenye.

       "Sekarang,waktunye gue ngebuktiin, bener gak die ada di rumah ape bener die udeh di markasnye," Komeng kepaksa ngoceh sendirian, lantaran mau ngoceh sama marbot mesjid kebetulan lagi nggak ada. Mau ngoceh sama siape coba?

       Makanya Komeng buru buru nyemplak ke motornye.

       Meski kagak ngebut, akhirnye Komeng sampe di depan rumahnye.

       Di hari Senen, bukan cuman rumahnye nyang sepi. Rumah tetangganye juga sunyi. Komeng nyang seudeh matiin mesin motor, plarak plirik ke halaman rumahnye, nggak ngeliat bokinnye lagi nyiram kembang.

       " Die pasti masih nyiangin ikan," batin Komeng sembari ngambil selulernye di kantong jaket.

       Tanpa ragu, setelah mencari nama bokinnye, Komeng langsung ngebel.

        Tak lama Komeng ngedenge lagi suara Juleha.

        " Idiiih... abang.... tumben belon lama ngebel udeh nelpon lagi?"

        " Emang nggak boleh nelpon bini nyang ngedadak dirinduin laki?"

        " Pastinye sih jelas boleh bang. Cuman, maaaaaf banget. Leha kan lagi konsen nyiramin kembang. Ntar, kalo hape Leha kesemprot aer, emangnye abang mau ngebelin BB?" Ujar Juleha dengan sangat mesra, tapi dia tak tahu kalo suaminya ada di depan rumah dan Komeng, sampe melototin mata selebar lebarnya, nggak bakalan ngeliat bokinnya berdiri di halaman rumah dan sedang sibuk nyiram kembang

          " Oke deh kalo begitu. Siraminnya nyang merata ye, supaya kembang kembang kita terus seger buger," sahut Komeng, nyang kelar matiin HP langsung narik nafas panjang.

          Bukan lantaran kagak kesel. Tapi, Komeng kesel setengah koit. Bayangin, die ada di depan rumah dan nggak ngeliat kembangnye lagi disiramin, eh, bisa bisanye, sang bini ngaku lagi sibuk nyiram kembang.

Bersambung.........