CERITA (01)

HATI SELEMBUT SAGU

Oleh: Oesman Doank

                                                  SATU

      SEBENERNYE sih bukan cuman sering, tapi kabar tentang bokinnnye udeh lama Komeng denger. Malah,  beberape orang nyang sengaja ngelaporin soal Juleha, nyang bilang beginilah, begitulah  sampe bilang begonolah, cukup banyak. Pokoknye, kabar yang didenger langsung sama Komeng soal bokinnye, sedemikian plit komplit..

      Semua laporan nyebutin hal yang sama aje. Yaitu, bahwa  hobi Juleha kebilang unik. Dibilang unik, lantaran  begitu Komeng nyang setiap pagi ngacir ke kantor buat cari nafkah, Juleha langsung minggat ninggalin rumah. Bukan buat cari nafkah, tapi buat ngerumpi ples makan makan dimane tempat yang disuka dan bisa jadi pos buat ngerumpi.

      Ngayapnye bukan ngelangkah positif, tapi nimbrung di markas ibu ibu  hobi  ngerumpi

     Makanye, kalo di mate Komeng tampil pemilik rumahku istanaku, begitu lakinye ngantor Juleha ngaku sama sekali kagak betah di rumah

     Pokoknye, aneka pengaduan soal bokinnye, kayak aer di sungai Bengawan Solo, nyang terus mengalir deres sampe jauh.  Tau deh tuh nanti banjirnye dimane. Nyang jelas, kalo di Komeng cuman kebanjirn info. 

     Info soal bokinnye, nyang sehari hari - ternyata, lebih sering ada di luar rumah timbang ada di rumah. Cuman, kate orang orang, Juleha termasuk cewek nyang jago ngatur strategi.

       Giliran lakinye di rumah, bener bener bak wanita assoi makjrot. Kalem, alim dan kayak gak nyimpen lahar panas. Tapi, pas lakinye ngantor, nggak ada dua jenak, die udeh kunci pintu dan beerrrrr... langsung deh ke markas Rumani alias Rumpi Masa Kini. Bisa seharian full. Juleha afal banget die mesti pulang ke rumah jam berape.

        Jadi, sekiranye Komeng bakal pulang jam berape, Juleha tahu kalo die udeh buru buru pulang supaya pas lakinye pulang, die udeh ada di rumah, udeh nyediain makanan, kopi, air putih ples korek kuping khusus buat lakinye.

       Komeng selalu nyangka, makanan nyang dinikmati setiap sore, made in bokinnnye. Padahal, makanan jenis ape juga boleh beli di warung. Cuma sesampe di rumah, Juleha langsung memodifikasi. Artinye, die anget angetin tuh masakan. Seolah olah, emang sibuk lagi masak buat laki, Padahal, wow.. n'tu makanan assembling alias makanan boleh beli punya.

          Kadang beli di rumah makan padang

          Seringnye sih beli di warung tegang, eh, warung tegal alias warteg

          Baik yang diangetin di penggorengan maupun di panci, semua boleh beli alias bukan buatan atawa olahan sang Bokin.

Bersambung.......